Бу зоопаарка Михаил Николаев дьаһалынан 2001 сыллаахха, Өктөм сиригэр арыллыбыта. Сахабыт сиригэр айылҕа сэдэх кыылларын иитэн дьоҥҥо-сэргэҕэ көрдөрөр, билиһиннэрэр билигин атаҕар бигэтик турбут тэрилтэ буолар. Бастакы дириэктэринэн, мин манна бэтэринээринэн үлэлии кэлэрбэр, СГУ биологическай факультетын саҥа бүтэрбит биолог идэлээх Лука Николаевич Сафонов үлэлии сылдьара зоотехнигынан — Валерий Николаевич Курчатов, уруккута “Кириэстээх” совхоз зоотехнига. Кини булчут, кыылга-сүөлгэ сыһыаннаах буолан хайдах эрэ үлэлииргэ чэпчэки курдуга.

Михаил Ефимович эрдэ, кэлин Москваҕа даҕаны олордоҕуна, дойдутугар кэллэҕинэ хайаан даҕаны зоопаарканы эргийэн, көрөн ааһар буолара. Олус оннук сэмэлиирин, хайҕаабытын да истибэтэҕим. Биирдэ сайын лааҕыр оҕолорун кытары кэлэ сылдьан ыраахтан туртастар вольердарын одуулуу турарыгар түбэһэ түспүтүм. Тугу көрөр буоллаҕай диэн чугаһаабыппар, «Ити хахханы” туох бэрэбинэннэн туттугут?” диэбитигэр “хатыҥы хастаан” диэччи буолбутум. Ону, “Эс, атын мас дии”, -диэбитэ. Ол саҕана зоотехник тэтиҥ мас сутукатын тайахтарга сулаан сиэтэр этэ. Ол бэрэбинэлэринэн туртастарга хахха тутан таһаарбыттарын мин илбэт эбит этим…

Бу иннинэ мин Михаил Николаевы кытары кини тыа хаһаайыстыбатын миниистиринэн үлэлии сырыттаҕына билсибитим. 1979 сыллаахха Саха госуниверситетын бүтэрэрбитигэр кэргэмминээн Александр Филипповичтын (биһиги оччолорго үөрэҕи 70-ча буолан бүтэрбиппит, бары өрөспүүбүлүкэ араас совхозтарыгар, ким эрэ тыа хаһаайыстыбатын институтугар о.д.а.тарҕаспыппыт) тыа хаһаайыстыбатын миинистиэристибэтигэр үлэҕэ анаммыппыт. Кэргэним сүөһү иитигэр салааҕа зооинженеринэн, мин ветеринария салаатыгар идэбинэн. Михаил Ефимович ирдэбиллээх салайааччы этэ. Бэнидиэнньик аайы үлэһиттэри отчуоттатара уонна эмиэ атын сыалы-соругу туруоран командировкаларга ыыталыыра. Хаһаайыстыбаларга элбэхтик сылдьарбыт…

1981 сыллаахха, биһигини эдэр ыалы, хоту оройуоҥҥа – Александр Филипповиһы «Анаабыр” совхоз дириэктэринэн, миигин Сааскылаахха бэтэринээринэй ыстаансыйа салайааччытынан —анаталаан ыыппыта. Анаабырга биэс сыл олорон баран мин дойдубар Хаҥаласка көһөн кэлбиппит, салгыы тыа хаһаайыстыбатын министиэристибэтигэр үлэлээбиппит. Михаил Ефимовиһы, ирдэбиллээх, элбэх билиилээх-көрүүлээх салайааччыны, кытары алтыһан ааспыт сылларбын истиҥник саныыбын.

Людмила Коженкина, бэтэринээринэй сулууспа бэтэрээнэ, СӨ айылҕа харыстабылын туйгуна.