Бу күннэргэ Хаҥалас улууһун Өктөмүгэр «Кулаковскай ааҕыылара-2025» мөккүөр түһүлгэтэ буолан ааста. Өрөспүүбүлүкэ таһымнаах тэрээһин маҥнайгы Бэрэсидьиэммит Михаил Ефимович Николаев төрөөбүт дойдутугар Өктөмҥө, Николаев - Кииҥҥэ тэрилиннэ. Билим алын академията ыытар уолаттар дебаттара бэрт сэргэхтик ааста. “Мөккүөр түһүлгэтэ” уолаттар дебаттарын туһунан бэйэтин санаатын социология билимин дуоктара, профессор Ульяна Винокурова телеграм-ханаалыгар бу курдук үллэстэр:

Инникигэ кынаттыыр тэрээһин

– Ханна олорор ордугуй: дэриэбинэҕэ дуу, куоракка дуу, ханна төрөөбүккүнэн туһалаах буолаҕын диэн тугуй, оҥоруу өй үтүө уонна мөкү өттүлэрэ о.д.а. боппуруостарга “Мөккүөр түһүлгэтэ” ыытылынна. Өрөспүүбүлүкэ араас оскуолаларыттан мустубут уолаттар дебаттара Николаев-кииҥҥэ бэрт сэргэхтик ааста.

Төрдүс төгүлүн ыытыллыбыт “Мөккүөр түһүлгэтин” көҕүлээччилэринэн методическай лаборатория салайааччыта Светлана Дмитриевна Пудова, история учуутала Семен Михайлович Васильев уонна В.Н.Оконешников аатынан Павловскай орто оскуолатын алын кылаастарын учуутала Лариса Львовна Егорова буолаллар.

А.Е.Кулаковскай – Өксөкүлээх Өлөксөй норуоппут духуобунай лиидэрин санааларын тэнитэргэ уонна олоххо киллэрэргэ туһуламмыт өрөспүүбүлүкэтээҕи хамсааһыҥҥа “Оҕонньор кэпсээнэ” лаборатория үлэлэһэр.

Саха Өрөспүүбүлүкэтин маҥнайгы Бэрэсидьиэнин М.Е.Николаев бибилэтиэкэтин-архыыбыгар билиигэ тардыһыылаах, сытыы-хотуу уолаттар, ыччаттар толору муһуннулар. Михаил Ефимович кырачаан эр дьоҥҥо ураты болҕомтолооҕо, сымнаҕас сыһыаннааҕа, “кинилэр санныларыгар өрөспүүбүлүкэбит кэскилэ сүктэриллэр” диирэ.

Өрөспүүбүлүкэбит үгүс улуустарыгар уолаттарга анаан хас да хайысхалаах араас дебаттар ыытыллаллар. “Мөккүөр түһүлгэтэ” бэртээхэй уратылардаах: уу сахалыы тылынан ыытыллар, Николаев-кииҥҥэ үс бөлөх сааһынан үктэллэргэ төрдүс кылаастан саҕалаан уолаттар күөн көрсүһүүлэрэ тэриллэр. Сорох хамаандалар 2022 сылтан төрүттэнэн, билигин кыттааччылар отой нуотанан курдук оонньууллар.

Интеллектуальнай хамаанда сорох чааһа буолуу – бу саха култууратын саҥа компетенцията, кыаҕа. Сахабыт ыччата араас күрэхтэһиилэргэ ситиһиилээхтэр – биирдиилээн уонна хамаанданан тустууга, ытыыга, марафоҥҥа, устууга, хары баттаһыыга, дуобакка о.д.а. Оттон манна өй өттүнэн хамаанданан киирсии, уолаттары билиилэрин туһанан, бэйэ икки ардыгар итэҕэтиилээх сыһыаны олохтооһун. Бу инникитин кинилэри уопсастыба саҥа ыҥырыыларыгар бэлэмниир.

Маны сэргэ, бырайыак өссө биир “фишката” – эр дьон умсугутар идиэйэлэринэн холобур буолардыы тыл этиилэрэ.

Тэрээһиҥҥэ оҕолору сэргэ уопсастыбаннай лиидэрдэр кытыннылар. Александр Протодьяконов Мэҥэ Хаҥаластан уонна Тааттаттан төрүттээх улуу суруйааччылар уонна биллэр урбаанньыттар төрөөбүт дойдуларын туһунан кэпсээтэ. Горнай улууһугар “Маҥарас” микрополис бырайыагы төрүттээччи Иван Степанов кытынна, бырайыагын билиһиннэрдэ.

Бу иһитиннэриилэр дебаттарга киирбит ыйытыыларга бэйэлэринэн хоруй буоллулар.

Мин бэйэм сөбүлүү истибит оҕолорум Артем Егоров, Вася Павлов, Харысхан Алексеев, Давид Иванов инникитин хайдах эр дьон буола улаатыахтарын харахпар ойуулаан көрдүм.

Хас биирдии кыттааччыга сырдык суолу баҕарабын! Инникитин хас биирдиилэрэ Николаев-кииҥҥэ төрүт норуоппут дьылҕатын санныларыгар сүкпүт, атахтарыгар бигэтик турбут лиидэрдэр буолан кэллиннэр.