Былырыын кыһын сэтинньи ый. Национальнай бибилэтиэкэҕэ СӨ бастакы Президенэ Михаил Николаев «Билиигинэн кыайыаҥ» стипендиятын педагогическай наука доктора, дьоҕурдаах оҕолор Гонконннааҕы оскуолаларын дириэктэрэ Патрик Хак Чанг Ламҥа туттарбыта

Патрик Лам үлэтин баай, чаҕылхай уопутун онно мустубут дьоҥҥо аһаҕастык кэпсээбитэ. Бу 50 саастаах киһи лаппа эдэр көрүҥнээҕин, сүүрүүгэ марафонец буоларын, олоххо үгүс үлүһүйүүлээҕин, оҕону сайыннарарга сөптөөх эйгэни хайдах үөскэтэрин, тэрийэрин истибит дьон бары сэҥээрбитэ, сөхпүтэ.

--Саха сирин бастакы Президенэ Михаил Ефимович Николаев Саха сирэ сайдарыгар олугу уурбут сырдык киһи. Оҕолор, эдэр дьон сайдалларыгар ураты болҕомтотун уурар, кыһаллар,--диир Патрик Лам. –Ханнык баҕарар идэни тал: ааҕыы киһиэхэ наада. Билиҥҥи технология муҥутуурдук сайдан турар кэмигэр кумааҕы кинигэттэн, кумааҕы хаһыаттан ураты киһи билиини дириҥник сомсор албаһа өссө суох. Баар да буоларын саарбахтыыбын. Тоҕо диэтэххэ, кумааҕы кинигэттэн ааҕыы көдьүүһэ улахан. Бастатан туран, гаджет, тиэхиньикэ харахха ыарахан дьайыылаах. Иккиһинэн, үчүгэй литератураны, кинигэни син биир кумааҕыттан ааҕар ордук. Мэйиигэ тутарга, өйдүүргэ кэбэҕэс, табыгастаах.

Гонконгтан кэлбит оҕолор «Я—гражданин мира» симиэнэ арыллыытыгар эрчимнээхтик үҥкүүлээн көрдөрдүлэр.

Былырыын сайын Патрик Лам үөрэнээччилэрэ «Норуоттар икки ардыларынааҕы интеллектуальнай Ооньууларга», «Туймаада» олимпиадаҕа, Хаҥалас сиригэр экспедицияҕа сылдьыбыттара, үгүс саҥаны бэйэлэригэр арыйбыттара, үрдүк кыайыылары ситиспиттэрэ.

Жанна Леонтьева