Саха Өрөспүүбүлүкэтин Бастакы Бэрэсидьиэнин М.Е. Николаев аатынан Өктөмнөөҕү наука уонна үөрэх киинин 3 кылааһын үөрэнээчилэрэ Николаев -Центрга алтынньы 14 күнүгэр буолан ааспыт "Саха Өрөспүүбүлүкэтин" былааҕа диэн аһаҕас уруокка кытыннылар.

Дьарык сүрүн сыалынан-соругунан - оҕолорго төрөөбүт дойдуларын былааҕын туһунан өйдөбүлү иҥэрии буолла .Дьарыкка оҕолор бэйэлэрин төрөөбүт дойдуларын туһунан кэпсэттилэр,картатын көрдүлэр.

Киин үлэһитэ Өрөспүүбүлүкэ былааҕын, гиэрбэтин, гиимин туһунан кэпсээтэ.

Былаах өҥнөрүн (халлаан күөх, үрүҥ, кыһыл, от күөх) арааран көрөн, хас биирдии өҥ туох суолталааҕын билистилэр, ырыттылар.

Ол курдук, халлаан күөх өҥ — ыраас, чуумпу хотугу халлааны, үрүҥ өҥ - кыһыҥҥы хаары, ыраас сырдык санааны, кыһыл өҥ — олох күүһүн, төрөөбүт дойдуга тапталы, норуот остуоруйатын, от күөх өҥ — тулалыыр айылҕабытын, доҕордоһууну, бииргэ буолууну көрдөрөрүн биллилэр. Ону таһынан үрүҥ өҥнөөх төгүрүк - күнү,күн сырдыгын, сылааһын көрдөрөрүн билистилэр уонна сахалар «үрүҥ күн оҕолоро» буолалларын өйдөөтүлэр.

Түмүгэр 1992 сыл алтынньы 14 күнүгэр Саха сирин былааҕа уларыйбытын туһунан биллилэр уонна бэйэлэрин санааларын эттилэр, сөбүлүүр өҥнөрүн туһунан кылгастык кэпсэттилэр .

Маннык дьарыктар оҕолорго төрөөбүт дойдуга тапталы, киэҥ туттууну иҥэрэргэ, ону таһынан төрөөбүт тылы, култуураны, үгэстэри билиһиннэрэргэ улахан көмөлөөх буолаллар.