Бүгүн, кулун тутар 16 күнүгэр, Саха Өрөспүүбүлүкэтин бастакы Бэрисидьиэнин М.Е. Николаев библиотека-архыыбыгар "Николаев-Киин" уораҕайыгар Өксөкүлээх сардаҥата сандаарда. Бу күн 1877 сыллаахха саха суругунан литературатын төрүттээччи, үс реалист суруйааччылартан биирдэстэрэ, философ, этнограф Алексей Елисеевич Кулаковскай - Өксөкүлээх Өлөксөй күн сирин көрбүтэ.Аахсыйаны Николаев-Киин үлэһиттэрэ уонна Өктөмнөөҕү үөрэх уонна билим киинин дириэктэрин сүбэһитэ Кычкина Лилия Александровна иилээн-саҕалаан ыыттылар. Тэрээһиҥҥэ Өктөмнөөҕү үөрэх уонна билим киинин үөрэнээччилэрэ, Өктөм нэһилиэгин олохтоохторо кыттыыны ыллылар.Үгэс курдук Өксөкүлээх сардаҥата Таатта улууһуттан саҕаланна. Алексей Елисеевич сиэнэ Кулаковская Рива Реасовна аал уоту аһатан, алгыс тылын этэн, кыымы саҕан ылан бүтүн өрөспүүбүлүкэбитигэр тарҕатта. Куйаар ситимин нөҥүө быһа эфиргэ холбонон кыттааччылар туоһу буоллулар уонна салгыы Өксөкүлээх Өлөксөй туһунан "Путь в вечность" диэн документальнай киинэни көрдүлэр."Өксөкүлээх сардаҥата - Свет Кулаковского" аахсыйа Михаил Ефимович Николаев көҕүлээһининэн, Николаев-Киин уонна Бастакы Бэрэсидьиэн оскуолаларын ситимэ өйөбүлүнэн 2022 сыллаахтан ыла ыытыллар. Уопсайынан бүгүҥҥү тэрээһиҥҥэ куйаар ситимин нөҥүө быһа эфиргэ 67 точкаттан кыттааччылар холбоннулар. Кинилэр быыстарыгар Алдан куорат 9-с №-дээх орто оскуолатын, академик В. Киренскай аатынан Амма лицейин, Большой Нимныр 25-с №-дээх орто оскуолатын үөрэнээччилэрин уонна учууталларын коллективтара. Ону таһынан республика араас муннуктарыгар Өксөкүлээх сардаҥата эмиэ сандаарда!