Өктөм нэһилиэгин А.С.Данилова аатынан “Барҕарыы” култуура киинэ тохсунньу 12 күнүттэн олунньу 8 күнүгэр диэри Дьокуускайдааҕы А.Д. Макарова аатынан култуура уонна искусство колледжын фольклор салаатын 3 куурсун устудьуона Степанова Виктория Александровна билиитин-көрүүтүн, саха норуотун ырыатын-тойугун түмсүүлэргэ билиһиннэрдэ. Ол курдук, Виктория Александровна 5 нэһилиэк түмсүүлэрин кытта ыкса үлэлээн, элбэх сыратын биэрдэ. Өктөмнөөҕү М.Е.Николаев аатынан Билим-үөрэҕирии киинин оҕолоругар, Агротехнологическай университет Өктөмнөөҕү салаатын устудьуоннарыгар, «Сардаҥа», «Дьиэрэй», “Өркөн” улахан дьон түмсүүлэригэр сөпкө тыыныыга, сахалыы кылыһаҕы таһаарыыга эрчиллиилэри көрдөрөн, оҥотторон сэҥээриини ылла. Ону таһынан хас биирдии бөлөххө сөп түбэһэр норуот ырыаларын үөрэтэн репертуардарын байытта. Оскуола улахан кылаастарын оҕолоругар бэйэтэ үөрэнэр кыһатын туһунан, ханнык салаалар баалларын, онно хайдах туттарсан киириэххэ сөбүн сиһилии кэпсээтэ. Оҕолор олус сэҥээрэн иһиттилэр, элбэх боппуруостары биэрдилэр.

Олунньу 7 күнүгэр бастакы Президент М.Е.Николаев архыып-библиотекатыгар – Николаев кииҥҥэ Виктория Александровна «Үйэлээх үгэспит туругурдун» диэн быраактыкатын отчуоттуур дьоро киэһэтэ буолан ааста. Бу кэнсиэргэ Өктөм нэһилиэгин фольклорнай бөлөхтөрө бары кытыннылар. Кэнсиэри Виктория Александровна иилээн-саҕалаан ыытта. Кини бэлэмнээбит бөлөхтөрө саҥа ырыаларын дьон-сэргэ олус сэҥээрэн көрдө уонна дохсун ытыс тыаһынан биһириирин биллэрдэ.

Виктория Александровна, куоракка улаапыт оҕо норуот уус-уран айымньыларын сэргээн, култуура колледжын төрүт салаатыгар киирэн сайдан, төрөөбүт тылын, ырыатын-тойугун дьоҥҥо тарҕатар исписэлиис буоларга уһуйулла сылдьара хайҕаллаах. Кини дьону кытта биир тылы буларынан, бэйэтин билиитин сөпкө тарҕатарынан, эйэҕэс майгытынан нэһилиэк дьонугар сөбүлэттэ. Онон, эһиил быраактыкатын биһиэхэ кэлэн барарыгар ыҥырдыбыт.

Маннык эдэр ыччаты уһуйан, үөрэтэн, дьиҥнээх үлэни кытта дьүөрэлээн тэрийэр култуура колледжын бары үлэһиттэригэр барҕа махтал тылбытын аныыбыт!

Федора Фомина