у сыл сэтинньи 11 күнүгэр Былатыан Ойуунускай аатынан Чөркөөх орто оскуолатыгар «Кинилэр Өрөспүүбүлүкэ саргытын түстээбиттэрэ» бырайыак чэрчитинэн Исидор Барахов аатынан Үөһээ Бүлүү 1N-дээх, Нам улууһун Максим Аммосов аатынан Хатырык орто оскуолаларын кытары куйаар ситиминэн телемост олохтонно.

Бу көрсүһүү биир саҥа саҕалааһынынан телемоска Хаҥалас улууһун М.Е.Николаев аатынан Өктөмнөөҕү билим-үөрэх киинэ кыттыста. Салгыы бырайыакка бу түөрт улуус оскуолалара биир ситимнээхтик үлэлиир олуктара уурулунна. Онон Саха сирин судаарыстыбаннаһа олохтонуутугар сүҥкэн кылааттарын киллэрбит ытык мааны дьоммутун үйэтитэр сыаллаах-соруктаах төрөөбүт түөлбэлэрин кэнчээрилэрэ бу бырайыакка тоҕуорустулар. Бырайыак үлэтэ кэҥээн, чопчуланан, хайысхата уларыйан биэрбитинэн «Саха сирин судаарыстыбаннаһын саҥа кирбиитигэр» диэн ааттаах салгыы үлэлиэҕэ.
Телемост төһө да ыгым кэрчик кэм иһигэр ыытылыннар, оҕолор бэйэ бэйэлэрин эҕэрдэлэһэн, хоһоон ааҕан, дьүһүйүү кытта көрдөрдүлэр.
Исидор Барахов аатынан оскуола музейын салайааччыта А.Г.Хобусарова, Өктөмтөн директор сүбэһитэ, педагог- организатор Л.А.Кычкина, Чөркөөх оскуолатыттан оҕолор общественнай хамсааһыннарын председателэ Айтал Гуляев тыл эттилэр.
Михаил Николаев аатынан библиотека-архыып киинин салайааччыта Юрий Иванович Семёнов олус умсугутуулаахтык оҕолорго туһаайан: «Төрөөбүт тылгытыттан саҕалаан нууччалыы, омуктуу тыллары дьаныһан үөрэтиҥ, сүрэхтээх, бэйэҕитигэр ирдэбиллээх буолуҥ», — диэн эппитэ барыбытын олус астыннарда, оҕолору үөрэххэ-билиигэ хорутуулаахтык ылсалларыгар кынаттаата.
Кэлэр сылга бу сетевой оскуолалар Өктөмҥө тиийэн оскуолаҕа, библиотека-архыып киинигэр бараллара былааннанар, үлэ саҥа тыынын ылыаҕа.

Санатан эттэххэ, бырайыак үлэлээбитэ бэһис сылыгар барда. Чөркөөх орто оскуолатын гуманитарнай предмет учууталларын салайар Эмма Кашкина уонна П.А.Ойуунускай аатынан Судаарыстыбаннас музейын кыттыгас бырайыактара буолар.