Саха Өрөспүүбүлүкэтин Национальнай библиотеката тэриллибитэ 100 сылыгар сөп түбэһиннэрэн, бүгүн Чурапчы улууһугар Национальнай библиотека күннэрэ ыытыллар. Манна өрөспүүбүлүкэ улуустарын, Чурапчы бары нэһилиэктэрин библиотекардара, култуура тэрилтэлэрин туһааннаах бэрэстэбиитэллэрэ, уопсастыбаннас кытынна.

Дьаһал чэрчитинэн улуус дьаһалтатыгар үөрүүлээх тэрээһин ыытылынна. Улуус баһылыга Степан Саргыдаев Саха национальнай библиотека дэлэгээссийэтин, тэрээһин бары кыттыылаахтарын эҕэрдэлээн туран, улууспут историятыттан быһа тардан билиһиннэрдэ, биир дойдулаахпыт, бөдөҥ Судаарыстыбаннай диэйэтэл Иван Николаевич Винокуров Саха национальнай бибилотеката тэриллиитигэр үгүс өрүттээх үлэни-хамнаһы тэрийбитин, тугунан да кэмнэммэт улахан өҥөлөөҕүн бэлиэтээтэ. Ол курдук, кини Москваҕа үлэлиир кэмигэр Саха сирэ сайдарын, нэһилиэнньэ үөрэхтээх, билиилээх буоларын туһугар күүһүн-уоҕун, кыһамньытын ууран үлэлээбитэ. Москваттан Дьокуускай куорат национальнай бибилэтиэкэтин фондатыгар элбэх кинигэ арааһын, ол иһигэр бэйэтин тус бибилэтиэкэтиттэн кытта ыытара.

Степан Анатольевич улуустааҕы киин библиотека, эмиэ атыттартан хаалбакка, билиҥҥи кэм ирдэбилинэн, аныгы технологиялары туһанан, историяны үйэтитиигэ, тылы-өһү сайыннарыыга, дьон-сэргэ билиитин-көрүүтүн хаҥатыыга, духуобунаһын үрдэтиигэ киэҥ хабааннаах үлэни-хамнаһы тэрийэрин эттэ. Былырыын Ил Дархан Е.А. Борисов библиотеката олоххо киирэн, цифровизация хайысхатыгар үлэ-хамнас саҥа таһымҥа тахсыбытын, үлэ миэстэтэ эбиллибитин, онуоха национальнай библиотека салалтата, генеральнай дириэктэр Саргылана Максимова улахан өйөбүлүн иһин истиҥ махталын тиэртэ.

Салгыы Национальнай библиотека генеральнай дириэктэрин солбуйааччы Василий Борисов тэрилтэ 100 сыллаах үбүлүөйүгэр анаан туох үлэни-хамнаһы, дьаһаллары тэрийэ сылдьалларын туһунан сырдатта. Быйыл күһүн Россиятааҕы 4-с библиографическай кэнгириэс Дьокуускай куоракка ыытыллыахтааҕын этэн туран, экраҥҥа маныаха туһуламмыт бырайыагы, бырайыак хайысхаларын билиһиннэрдэ, онно кыттан үлэлэһэргэ ыҥырда. Оттон улуус баһылыгын социальнай боппуруостарга солбуйааччы Мария Кронникова улуус култууратын туһунан мустубут дьоҥҥо сиһилии билиһиннэрэн кэпсээтэ.

Чурапчытааҕы кииннэммит библиотека сэбиэдиссэйэ Айталина Смирникова улуус киининээҕи уонна нэһилиэк библиотекалара күн бүгүн тэрийэр үлэлэрин-хамнастарын, туох кыһалаҕалар баалларын туһунан сырдатта.

Салгыы өрөспүүбүлүкэбит бастакы Бэрэсидьиэнэ М.Е. Николаев архыып-библиотекатыгар ылыллыбыт сүрүн бырайыагын кылаабынай библиотекара Анна Захарова тэрээһин кыттыылаахтарыгар сиһилии билиһиннэрдэ.

Түмүккэ Чурапчы улууһун дьаһалтата уонна Саха национальнай библиотеката хардарыта бииргэ үлэлэһиигэ сөбүлэҥ түһэристилэр.

Күн иккис аҥаарыгар “Современные подходы и технологии в библиотечном деле: от традиций к современности” диэн дириэктэрдэр сэминээрдэрэ ыытыллар.