Бүгүн, кулун тутар 14 күнүгэр, Николаев-Кииҥҥэ А.Е. Кулаковскай – Өксөкүлээх Өлөксөй төрөөбүт күнүн көрсө «Мөккүөр түһүлгэтэ» интеллектуальнай оонньуу буолан ааста. Бу үгэскэ кубулуйбут тэрээһини сылын аайы В.Н. Оконешников аатынан Павловскай орто оскуолата уонна Николаев-Киин иилээн-саҕалаан ыыталлар.

Сүрүн ирдэбилэ - уол оҕону төрөөбүт тылынан санаатын сааһылаан тиэрдэрин көҕүлээһин. Кыра уолаттарга "Аман өс " күрэҕэ, 5-11 кылаас уолаттарыгар мөккүөр түһүлгэтэ ыытылынна. Сахалыы тылынан дебакка – мөккүөр түһүлгэтигэр – республика араас оскуолаларыттан 4-11 кылаас уоланнара төрөөбүт тылларынан этэн-тыынан, саҥаран-иҥэрэн кыттыыны ыллылар. Ол курдук Хаҥалас улууһуттан Уулаах Аан орто оскуолата, Мэҥэ-Хаҥаластан Майа лиссиэйэ уонна Павловскай орто оскуолата, Гуорнайтан Өрт орто оскуолата, Дьокуускайтан “Айыы Кыһата” национальнай гимназия уонна Тулагы орто оскуолата кытыннылар.

"Аман өс" күрэх кыайыылааҕынан Павловскай орто оскуолатын 4 кылааһын үөрэнээччитэ Георгий Кулаков буолла.

Тэрээһин улахан интэриэһи тарта. Быйыл мөккүөр түһүлгэттигэр оҕолорго олус чугас, интэриэһинэй темалар таарыллыннылар: 5-6 кылаастарга «Тыа сиригэр олорор ордук», 7-8 кылаастарга «Интернет: киһи-аймах баайа уонна куһаҕан содула» уонна 9-11-гэ «Оҥоһуу интеллект: үтүө-мөкү өрүттэрэ». Кытааччылар бигэргэтиһэн, утарсан, санааларын үллэстэн бары биир толкуйга – саха тылын сайыннарар наадалааҕын, дойдуга таптал туохтааҕар да күүстээҕин туһунан түмүккэ кэллилэр.

Күрэх түмүгүнэн 5-6 кылаастарга – Павловскай орто оскуолатын хамаандата муҥутуур кыайыылаах аатын сүктэ, 2 үрдэл – Майа лиссиэйин хамаандата, 3 үрдэл – Уулаах Аан орто оскуолатын хамаандата. 7-8 кылаастарга 1 үрдэл – Айыы Кыһатын гимназиятын хамаандата, 2 миэстэни ылла Павловскай орто оскуолатын хамаандата, 3-кэ – Өрт орто оскуолатын хамаандата. Улахаттарга кыайылаах буоллулар Павловскай орто оскуолатын хамаандата, 2-с буоллулар Тулагы орто оскуолатын уолаттара.

Тиһэҕэр сүрүннүүр эксперт, Саха Республикатын бастакы президенэ М.Е. Николаев соратнига, профессор Ульяна Винокурова «Улаатан эрэр уолаттар толкуйдуур дьоҕурдарын көрдүбүт, тылларынан мээчиги бырахсар курдук киирсэн биир өйү-санааны үөскэтэллэр. Бу уопут интеллектуальнай сайдыы буолар, онон саҥа таһымҥа тахсаҕыт. Этиилэргитигэр Өксөкүлээх Өлөксөйү, Михаил Николаевы аргумент быһыытынан аҕаларгыт хайҕаллаах» - диэн санаатын үллэһиннэ.

Манна бэлэмнэниигэ уолаттар сүрдээх элбэҕи билэллэр, араас туһалаах сатабылга үөрэнэллэр.

Тэрээһини тэрийиигэ кыттыбыт В. Оконешников аатынан Павловскай орто оскуолатын коллективыгар, чуолаан Светлана Дмитриевна Пудоваҕа дириҥ махталбытын тиэрдэбит. Маннык тэрээһин олус инникилээх, кэскиллээх. Инникитин бу тэрээһин кэҥээн иһэригэр баҕарабыт.