Бүгүн М.Н.Жирков аатынан култуура дыбарыаһын историческай саалатыгар Саха Өрөспүүбүлүкэтин бастакы бэрэсидьиэнигэр Михаил Ефимович Николаевка анаммыт быыстапка үөрүүлээх быһыыга-майгыга арылынна.

Баай ис хоһоонноох быыстапка “Николаев-Киин” СӨ бастакы бэрэсидьиэнин архыып-бибилитиэкэтинсэбиэдиссэйэ Юрий Иванович Семенов быһаччы көмөтүнэн тэрилиннэ. Быыстапкаҕа барыта 37 экспонат көрдөрүүгэ туруорулунна, ол иһигэр Михаил Ефимович бэйэтэ туттубут тэриллэрэ, судаарыстыбаннай наҕараадалара, киниэхэ бэлэхтэммит сувенирдар киирбиттэр. Биир сэдэх экспонатынан 2001 с. хостоммут, Михаил Николаев аатынан ааттаммыт алмаас копията буолла. Архыып-бибилитиэкэ быыстапкаҕа турбут 70 кинигэни историческай саалаҕа уонна Бүлүү куоратын 350 сыллаах үбүлүөйүнэн матырыйааллары П.Х. Староватов аатынан Бүлүүтээҕи кыраайы үөрэтэр түмэлгэ бэлэх уунна.

Бүлүү улууһун депутаттарын Оройуоннааҕы сэбиэтин бэрэссэдээтэлэ Гаврил Семенович Корякин, Бүлүү куоратын баһылыгын солбуйааччы Николай Варламович Иванов, улуус бэтэрээннэрин Сэбиэтин бэрэссэдээтэлин солбуйааччы Федор Федорович Николаев, Г.И.Чиряев музейын дириэктэрэ Михаил Семенович Томскай,П.Х.Староватов аатынан кыраайы үөрэтэр музей дириэктэрэ Татьяна Николаевна Афанасьева Саха сирин чулуу уола, өрөспүүбүлүкэбит сайдыытыгар сүдү кылааты киллэрбит Михаил Ефимович Николаев туһунан ахтан-санаан аастылар, Саха сирин норуотун туһугар оҥорбут үтүөтүн сөҕөн-махтайан кэпсээтилэр. Эдэр ырыаһыт Надежда Корякина “Сахам сирэ” диэн ырыанан мустубут дьону эҕэрдэлээтэ.

Тэрээһини оройуоннааҕы култуура сайдыытын уонна норуот айымньытын Киинин методиһа, СӨ култууратын үтүөлээх үлэһитэ Надежда Николаевна Иванова иилээн-саҕалаан ыытта. “Движение первых” оҕо уонна ыччат уопсастыбаннай түмсүүтүн Бүлүү улууһунааҕы салаатын салайааччыта Сардаана Егорова ыалдьыттарга экспозициялары билиһиннэрдэ.

Михаил Ефимович биһиги өйбүтүгэр-санаабытыгар инникини өтө көрөр үтүөкэннээх салайааччы, дьону-сэргэни түмэ тардар талааннаах, күүстээх санаалаах, бигэ тыллаах чулуу киһибит быһыытынан мэлдьи хаалыаҕа. Ол биир туоһутунан Бүлүү куоратыгар киниэхэ анаммыт быыстапка арыллыыта буолла.

Быыстапка Бүлүү куоратын 390 сыллаах үбүлүөйдээх күнүгэр диэри туруоҕа, онон улуус олохтоохторун интэриэһинэй быыстапкаҕа кэлиҥ, сылдьыҥ, сэргээҥ диэн ыҥырабыт.

Изольда Загитова.