Кулун тутар 22 күнүгэр Николаев-Киин уораҕайыгар "Мөккүөр түһүлгэтэ" уонна "Аман өс" күрэхтэһии буолан ааспыта. Тэрээһин Саха сиригэр 2023 – 2027 сыллар саха литературатын төрүттээччи, үөрэҕи-билиини тарҕатааччы, уопсастыбаннай деятель, саха омук духуобунай лидерэ, бөлүһүөк суруйааччы А.Е. Кулаковскай – Өксөкүлээх Өлөксөй биэс сылыгар анаммыта.

Күрэхтэргэ В.Н. Оконешников аатынан Павловскай орто оскуолатын, И.Г. Тимофеев аатынан Майа лицейын уонна "Айыы кыһата" национальнай гимназия оҕолоро уонна учууталлара кыттыыны ыллылар.

Эксперт хамыыһыйатыгар Мэҥэ Хаҥаластан: Васильев Семен Михайлович, история учуутала; Егорова Лариса Львовна, алын сүһүөх кылаас учуутала; Пудова Светлана Дмитриевна, «Оҕонньор кэпсээнэ» методическай лаборатория салайааччыта; Федорова Ольга Федоровна, английскай тыл учуутала үлэлээтилэр. Хаҥаластан: Лукина Анна Михайловна, А.Д. Широких аатынан Төхтүр орто оскуолатын саха тылын уонна литературатын учуутала; Петрова Анастасия Петровна, А.И. Притузов аатынан Уулаах Аан орто оскуолатын история уонна обществознание учуутала сыаналаатылар. Уонна Орто Халыма II Хаҥалас нэһилиэгиттэн кэлбит Ефимова Евдокия Даниловна, Д.С. Слепцов аатынан Эбээх орто оскуолатын саха тылын уонна литературатын учуутала, үлэлээтэ.

Тыҥааһыннаах киирсии кэнниттэн "Мөккүөр түһүлгэтэ" күрэххэ орто сүһүөх кылаастарга И.Г. Тимофеев аатынан Майа лицейын хамаандата бастаата, "Айыы кыһата" национальнай гимназия иккис буолла, В.Н. Оконешников аатынан Павловскай орто оскуолата үһүстээтэ. Кинилэр "Тыа сиригэр олохсуйан олорор ордук" тиэмэҕэ мөккүстүлэр. Улахан кылаастарга И.Г. Тимофеев аатынан Майа лицейын хамаандата бастаата. "Тыа сирэ сайдар саҕахтара" тиэмэҕэ учууталлары кытта күөн көрүстүлэр.

"Аман өс" күрэххэ В.Н. Оконешников аатынан Павловскай орто оскуолатыттан Анисимов Айсен - 1 миэстэ, Сергеев Сережа 2 миэстэ, Николаев Айхан 3 миэстэ буоллулар. Салайааччы: Дмитриева Александра Андреевна.