Бүгүн, сэтинньи 30 күнүгэр, М.Е. Николаев библиотека-архыыбыгар "Николаев-Киин" хомус күнүгэр аналлаах тэрээһин буолан ааста.

Саха Республикатын бастакы Президенэ Михаил Николаев саха үгэһэ, култуурата сайдарын туһугар туох үтүө үлэни ыыппытын, ону кытары саха хомуһун дьиктилээх чахчыларын, Өксөкүлээх Өлөксөй "Хомус" айымньытын туһунан Лилия Кычкина билиһиннэрдэ.

Бэйэтин чинчийэр үлэтин, дьиэ кэргэнин коллекциятын туһунан М.Е. Николаев аатынан Өктөмнөөҕү үөрэх уонна билим киинин 6 кылааһын үөрэнээччитэ Заморщикова Галя кэпсээтэ. Кини коллекциятыгар саха хомуһа эрэ буолбакка, Кытай, Татар, Алтай уо.д.а. омуктар хомустара бааллара сөхтөрдө. Уопсайа кини коллекциятыгар 15 араас хомустаах эбит.

Уонна Өктөм нэһилиэгин бочуоттаах олохтооҕо, хомусчут-импровизатор Клим Николаевич Адамов оҕону хомуска үөрэтии туһунан билиһиннэрдэ. Кинини утумнаан оҕолоро эмиэ хомуһунан дьарыктаналларын, оонньуулларын, ону тэҥэ оҕолору үөрэтэллэрин кэпсээтэ. Хоҥкунас тыастаах хомуска оонньоон көрөөччүлэр сүргэлэрин көтөхтө.

Тэрээһиҥҥэ М.Е. Николаев аатынан Өктөмнөөҕү үөрэх уонна билим киинин үөрэнээччилэр, учууталлара, төрөппүттэрэ кэлэн иһиттилэр. Хомустаах оҕолор сатабылларын көрдөрдүлэр.