Сэтинньи 23 күнүгэр Дьокуускай куоракка сахаттан бастакы профессор, ученай, хоту сирин чинчийээччитэ - Георгий Георгиевич Колесов төрөөбүтэ 130 сылыгар аналлаах республикатааҕы научно-практическай конференция ыытылынна.

Сүрүн тэрийээччилэр: Орто Халыма улууһун салалтата, СР Наукатын Академията, Арктикатааҕы култуура уонна искусство государственнай института, СР Национальнай библиотеката, СР Национальнай архыыба, И.С. Жараев аатынан СР омуктарын аудиовизуальнай наследиетын национальнай киинэ.

Георгий Георгиевич Саха Сирин экономикатын, тыа хаһаайыстыбатын сайдыытыгар, судаарыстыбыннас олохтонуутугар сүдү кылаатын туһунан Ил Дархан Айсен Николаев эҕэрдэ суругар бэлиэтээбит. Тэрээһиҥҥэ СР Правительствотын председателин солбуйааччыта Дмитрий Садовников, СР экономикатын миниистирин бастакы солбуйааччыта Мария Аргунова, СР тыа хаһаайыстыбатын миниистирин солбуйааччыта Николай Афанасьев кыттыыны ыллылар.

Саха Республикатын наукатын Академиятын президенэ Леонид Владимиров Георгий Георгиевич саха омуга тыа хаһаайыстыбатын билимин баһылыырыгар бастакынан суолу тэлбитэ диэн бигэргэттэ. Профессор Георгий Георгиевич саха сылгытын иитии боппуруоһун чинчийбитэ тыа сирэ сайдарыгар төһүү күүс буолуоҕа диэн эттэ.

Конференция модератордарынан Орто Халыма улууһун бочуоттаах олохтооҕо, социологическай наука доктора Ульяна Алексеевна Винокурова; ИГИиПМНС РАН Сибиирдээҕи отделениетын сүрүн научнай үлэһитэ, историческай наука доктора Наталия Ивановна Бурнашева; СР аҕыйах ахсааннаах олохтоох омуктар бырааптарын уполномоченнайа Константин Васильевич Роббек; II Мээтис землячествотын салайааччыта, Георгий Колесов хаан-уруу аймаҕа Лина Николаевна Явловская үлэлээтилэр.

Конференция кыттааччылара Георгий Георгиевич экономика, тыа хаһаайыстыба салаатыгар эрэ буолбакка кыра ахсааннаах олохтоох омуктар дьылҕаларыгар улахан оруоллааҕын, "Саха омук" уопсастыба чилиэнэ буолан республикабыт инникитин быһаарсыбыт чулуу дьону кытта ыкса үлэлээбитин, хара балыырга түбэһэн сырдык тыына ГУЛакка быстыбытын, СР бастакы Президенэ Михаил Николаев көҕүлээһининэн РФ Президенэ Борис Ельцин ыйааҕа тахсан үтүө аата эргиллибитин туһунан сиһилии кэпсээтилэр. Ону тэҥэ Арктика сирэ тупсарыгар, сайдарыгар саҥа проектарын, ньымаларын туһунан сырдаттылар.

Орто Халыма улууһун II Хаҥалас нэһилиэгин аатыттан Орто Халыма улууһун бочуоттаах олохтооҕо Иннокентий Сухомясов уонна СР бастакы Президенин М.Е. Николаев библиотека-архыыбын сүрүн библиотекаря Лилия Кычкина Георгий Георгиевич кыһатын - Дүөнсэ грамота оскуолатын туһунан, кини доҕоро, үөлээннээҕэ, Халыма уокуругун аан бастакы сэбиэдиссэйэ Даниил Степанович Слепцов туһунан сырдаттылар.

Конференция түмүгүнэн резолюция ылыллыаҕа, бүгүҥҥү докладтар хомуурунньукка киирэн бэчээттэниэхтэрэ. Бу барыта Георгий Колесов чаҕылхай олоҕун, үлэтин салгыы үөрэтэргэ, өйүн-санаатын олоххо киллэрэргэ биир сүдү улахан хардыы буолуоҕа.

Ааптар: Лилия Кычкина