Саха сиригэр киэҥник биллэр археолог, этнограф Василий Попов «Сүүрбэ сыл усталаах экспедиция» диэн саҥа кинигэтэ Ем. Ярославскай аатынан Саха музейыгар атыыга таҕыста.

«Ханнык баҕарар экспедиция үлэтэ эрдэ ыытыллар чинчийэр үлэттэн тутулуктаах, ол иһин тэрээһин кыһалҕаларын кинигэҕэ ырыттым уонна кэлэр кэмнэргэ ханнык сүрүн хайысхаларынан археологическай үлэ ыытыллыахтааҕын бэлиэтээтим. Кинигэ сүрүн соруга – археологическай-этнографическай үлэм түмүктэрин ааҕааччыга судургу, өйдөнүмтүө тылынан быһааран суруйуу», – диэн Василий Попов санаатын үллэстэр.

Киэҥ эйгэ ааҕааччыга анаммыт билим хабааннаах кинигэҕэ Василий Попов 20 сыллаах археологическай уонна этнографическай үлэтигэр олоҕуран, былыргы сахалар көмүүлэрин көрдүүр-булар ньымаларын ырытан суруйда. Билим эйгэтигэр тиһиллэ илик саха 15-18 үйэтээҕи көмүүлэр ис мастарын, ол иһигэр киһи өлүгүн араастык сытыарыы, уотунан сиэтэн ыраастааһын уо.д.а. сиэрдэри-туомнары бэлиэтиир. Салгыы, археологическай чахчыларга олоҕуран, саха палеоэтнографиятыгар саҥа быһаарыылар, өйдөбүллэр бэриллэллэр.

Сүрүннээн кинигэ анал идэлээхтэргэ: археологтарга, этнографтарга, музей үлэһиттэригэр ананар, ону таһынан кыраайы үөрэтээччилэр, саха төрүт култууратын билиэн баҕалаахтар эмиэ кэрэхсээн ааҕыахтара.

Кинигэ бэчээккэ тахсарыгар күүс-көмө буолбут үбүлээчилэригэр «Алмазэргиэнбаан» бырабылыанньатын бэрэссэдээтэлигэр Николай Долгуновка, «Николаев Центр» – библиотека-архыыбын сэбиэдиссэйигэр Юрий Семеновка уонна «Киэргэ» хампаанньа генеральнай дириэктэригэр Александр Павловка автор махталын тириэрдэр.