Күндү үөрэнээччилэр, учууталлар, үөрэх эйгэтин үлэһиттэрэ!

Киһи олоҕор саамай сырдык, бэлиэ күнүнэн — Билии күнүнэн эһиэхэ истиҥ эҕэрдэ буоллун!

Сахалыы тылынан тахсар «Дьоһуннааҕы кэпсэтии» бырайыак саҥа 2023/2024 үөрэх сылын саҕалыыр.

Быйылгы уратыбыт – «Өксөкүлээх үөрэҕин» олоххо киллэрии буолуоҕа диэн эһиэхэ биллэрэн турабыт. Бу кэнсиэпсийэ бырагыраамата Таатта улууһун М.Н. Турнин аатынан Тыараһа орто оскуолатыгар оҥоһуллубута. Ону өссө чочуйан, ситэрэн, «Дьоһуннааҕы кэпсэтии» федеральнай уруок киэбигэр сөп гына оҥорон биэрдибит.

«Өксөкүлээх үөрэҕэр» барыта 24 уруок баар буолуоҕа. Биир ыйга «Дьоһуннааҕы кэпсэтии» икки бэнидиэнньигэ «Өксөкүлээх үөрэҕэр» ананыаҕа.

Бары билэргит курдук, Саха Өрөспүүбүлүкэтин Ил Дархана Айсен Сергеевич Николаев 2023-2027 сыллары Өксөкүлээх сылынан биллэрбитэ. Онно тирэҕирэн, улуу киһибит өйүн-санаатын күүһүн, кыаҕын, төрөөбүт дойдутугар, норуотугар тапталын оҕону иитиигэ сүрүн хайысха быһыытынан туһанабыт.

Аны биир уратыбыт уруокка туттуллар видеоматырыйаал уонна тургутук (тест) «СААС» мобильнай сыһыарыыга баар буолла.

Балаҕан ыйын 4 күнүнээҕи уруок тиэмэтэ: «Өксөкүлээх үөрэҕэ: Билии-көрүү төрдө».

Уруок көмө матырыйаалларыгар киирдилэр:

• сценарий
• презентация
• видео
• интерактив

«Дьоһуннааҕы кэпсэтии» уруогу ыытарга туһалаах матырыйааллары бу сигэнэн хачайдааҥ ылыҥ: https://keskil14.ru/do-unnaa-y-kepsetii/ (балаҕан ыйын көрөҕүт).

Ситиһиилээх саҥа үөрэх сылын!

keskil14.ru