Ньурба оройуонун Култуураҕа Департаменыгар «Историческая память РС(Я)» уопсастыбаннай сэбиэт бэрэссэдээтэлэ Саргылана Александровна Неустроева, Өксөкүлээх Өлөксөй сиэнэ, Арассыыйа уопсай үөрэхтээһинин туйгуна, норуот дипломата Лариса Реасовна Кулаковская, СӨ «Национальнай архыып» салайааччытын солбуйааччыта Наталья Николаевна Малышева кыттыылаах «СӨ Ил Дархана А.С. Николаев Саха сиригэр 2023-2027 сыллар саха литературатын төрүттээччи, сырдатааччы уонна уопсастыбаннай диэйэтэл А.Е. Кулаковскай-Өксөкүлээх Өлөксөйгө анаммыт Биэс сыла» биллэриллибитигэр олоҕуран, «Духовное наследие окружения А.Е. Кулаковского» диэн бырайыак чэрчитинэн сүрдээх үчүгэй дириҥ ис хоһоонноох кэпсэтии, көрсүһүү буолла.

Ньурбабыт улууһун уран тарбахтаах иистэнньэҥнэрэ Галина Федорова салайааччылаах «Арыллыы» түмсүү Өксөкүлээх Өлөксөй айымньыларыгар анаммыт кыбытык тигии үлэлэрин көрөн сөхтүлэр.

Саха норуота бүттүүнэ аҕатын курдук саныыр ытык киһибит А.Е. Кулаковскайга анаммыт үлэлэрин Саргылана Александровна сырдатта уонна быйыл ыытыллыбыт 3 улахан тэрээһиҥҥэ, сүбэ мунньахха Ньурба оройуонун Култууратын Департамена кыттыһан сүҥкэн улахан кылаатын киллэрсибитигэр махтал тылларын эттэ.

Лариса Реасовна эһэтин, дьиэ кэргэнин, аҕатын туһунан истиҥник кэпсээн сырдатта. Бэйэтэ элбэх бырайыак ааптара буоларынан, туох ханнык былааннааҕын билиһиннэрдэ. Биир биллэр улахан бырайыагынан «Ысыах в Европе» буолар. Ол бырайыагынан 2018 сыллаахха Ньурба улууһуттан делегация Калининград куоракка тиийэн, улахан ыһыах ыспыппытын ахтан ааста уонна улууспут баһылыгар Алексей Михайлович Иннокентьевка улахан махталын тириэртэ. Эһиил былааннанан турар Сербияҕа ыытыллыахтаах ыһыахха ыҥырыытын биллэрдэ.

Салҕыы ыалдьыттарбыт Анна Андреевна Туманова салайааччылаах биһиги киэн туттар «К.Д.Уткин аатынан Норуоттар доҕордоһуулара музейыгар» ыалдьыттаатылар. Саҥа аныгылыы технологиянан тутуллубут музей дьиэтин көрөн сөхтүлэр уонна Ньурба улууһун сайдыыта киһи хараҕар быраҕыллар,суолгут – иискит тупсубута, саҥа тутуу бөҕө тутуллубутун көрөн сөхтүбүт диэн санааларын үллэһиннилэр.