Өксөкүлээх Өлөксөй сиэнэ, Российскай Федерация уонна Саха Республикатын культуратын үтүөлээх үлэһитэ, Российскай Федерация үөрэҕириитин туйгуна, Уус-Алдан улууһун, Бороҕон уонна Суотту нэһилиэктэрин бочуоттаах олохтооҕо Раиса Реасовна Кулаковская күн сириттэн күрэммитинэн оҕолоругар, чугас дьонугар, аймахтарыгар, дириҥ кутурҕаммын тиэрдэбин.

Кини тарбахха баттанар талааннаах педагог быһыытынан, Саха Сиригэр национальнай оскуола сайдарыгар сүҥкэн кылааты киллэрбитэ. Олоҕун бүттүүнүн дойдутун сайдыытыгар, оҕо-аймах, ыччат үөрэхтээх, сайдыылаах буоларыгар анаабыта, үгүс судаарыстыбаннай оҥкуллар олоххо киирэллэригэр күүс-көмө, өйөбүл буолбута.

Раиса Реасовна саха норуота улуу нуучча омугун кытары биир кэлимник сайдан кэлбитин оруннаахтык чинчийэн, Суорун Омоллоон курдук бас-көс киһибитин кытары тэҥҥэ үлэлэһэн, Саха сирин биир бастыҥ түмэлин тэрийсибитэ элбэҕи этэр. Кини төруттэспит киэн хабаанннаах үлэтэ норуоттар доҕордоһууларын сайдыытыгар биир бигэ укулаат буолар, сайдыыга, түмсүүгэ сирдиир.

Улуу Өксөкүлээх Өлөксөй сыдьаанын биир бастыҥ киһитэ, эһэтин олоҕун, үлэтин-хамнаһын дириҥэтэн үөрэппит, сырдык аатын сөргүтэргэ утумнаахтык үлэлээбит, үйэлэргэ хаалларбыт баараҕай үлэтэ өрөспүбүлүкэ, дойду таһымыгар сүҥкэн суолталаах.

Ытыктабыллаах киһибит Раиса Реасовна, төрөөбүт дойдуҥ буора сымнаҕас тэллэх, сылаас суорҕан буоллун. Эн сырдык мөссүөнуҥ биһиэхэ өрүү баар буолуоҕа.