Ытык мааны бар дьонум!

Саха омук үгүс үйэлэр анараа өттүгэр, Омоҕой оҕонньор, Эллэй эһэбит саҕаттан саҕыллыбыт үтүө үгэспитинэн, күөххэ үктэммиппитин, самаан сайын кэлбитин кэрэһэлиир Үрүҥ Тунах Ыһыахпытынан итиитик-истиҥник эҕэрдэлиибин!

Быйылгы сыл Арассыыйаҕа Иитээччи уонна Аҕа сүбэһит сылынан биллэриллибитэ, Сахабыт Сиригэр Ил Дархан Айсен Николаев Үлэ сылын бигэргэппитэ. Бу билиҥҥи кэмҥэ үрдүк суолталаах, дириҥ тоҕоостоох быһарыы. Иитии, үөрэх саха омукка, кэхтибэккэ сайдар, цивилизация үрдүк чыпчаалларыгар дабайар биир сүрүн олукпут буолар. Биһиги өс хоһооммут этэринии, “Кырдьаҕаһы хааһахха хаалыы сылдьан сүбэлэт” дииринии, билиҥҥи кубулҕаттаах кэмҥэ аҕа көлүөнэ толкуйа, сүбэтэ-амата, иитиитэ-такайыыта ыччакка ордук наада буолла.

Тыйыс айылҕалаах уһук кыраай дойдуга олорор дьоҥҥо, үлэ суолтата уонна үлэ сыанабыла икки бүк үрдүк. Өбүгэлэрбит улахан үлэнэн, элбэх сыранан Арктикаҕа тиийэ сыспай сиэллээхтэри, хороҕор муостаахтары тэниппиттэрэ, үрүҥ илгэнэн иитиллэн олорбуттара. Ол курдук өбүгэбит төрүт үгэһин салҕыаҕыҥ, үлэни өрө тутан, үөрэҕи-билиини баһылаан, кэскиллээх олоҕу түстүөҕүҥ!

Ил Дархан эппитинии, биһиги өрөспүүбүлүкэбит Улуу Россия бигэ тирэҕэ буолар. Ол курдук саха буоларгытынан киэн туттуҥ, далааһыннаахтык үлэлээҥ, аҥардас бүгүҥҥү күннээҕинэн эрэ буолбакка, сарсыҥҥыны өтө көрүҥ. Сарсын биһиги дьолбут, биһиги ситиһиибит, оҕолорбут, ыччаппыт кэскиллээх кэмэ! Үрдүк Айыыларбыт алгыстарын аныыр ытык күммүтүгэр үтүөнү түстүөҕүҥ, кэрэни кэрэһэлиэҕиҥ!

Үрүҥ Тунах ыһыаҕынан! Дьоллоох буолуҥ!

М.Е. Николаев,

Саха Өрөспүүбүлүкэтин Бастакы бирисидиэнэ