«Духуобунаһа суох нация суох. Алексей Кулаковскайы-Өксөкүлээх Өлөксөйү биһиги нациябытын көрдөрөр духуобунай лидербит, өрөспүүбүлүкэбит уобараһын быһыытынан ылыныах тустаахпыт», — диэн бэлиэтээтэ бүгүн Хаҥалас улууһугар Хачыкаат нэһилиэгэр буола турар «Өксөкүлээх Өлөксөй — Саха сирин духуобунай лидерэ» симпозиум аһыллыытыгар судаарыстыбаннай сүбэһит Михаил Николаев. Михаил Ефимович бэлиэтииринэн, Алексей Кулаковскай олоҕун, айар үлэтин, кини суруйан хаалларбыт үлэлэрин үөрэтии өссө да түгэҕин була илик. — Өксөкүлээх Өлөксөйү биһиги билигин өссө да арыйа иликпит. Кини үлэлэрин Арасыыйа, аан дойду таһымыгар таһаарыахха. Аан дойду ааттаахтарын кытта тэҥнээн көрүҥ, оччоҕо эрэ кини сүдүтэ, улуута тахсан кэлиэҕэ, — диэн этэр кини. Михаил Ефимович айар тыл аҕатын, саха литературатын төрүттээччин, бөлүһүөк суруйааччыны Өксөкүлээх Өлөксөйү оскуолаҕа киэҥник үөрэтии барыахтаах. — Бэһис кылаастан онуска диэри төрүт литератураны ааҕыыга 246 чаас бэриллэр. Итинтэн түөрт эрэ бырыһыана Алексей Кулаковскайга бэриллэр. Ити олус кыра. Биһиги кэнчээри кэлэр ыччаппытын Өксөкүлээх Өлөксөй айымньыларынан үөрэттэхпитинэ элбэҕи ситиһиэхпит, — диэн этэр Михаил Николаев. Саха Өрөспүүбүлүкэтин Бастакы бэрэсидьиэнэ литератураҕа сыһыаран Хачыкаат нэһилиэгэр Айар дьон дьиэлэрин тутарга этии киллэрдэ. — Хачыкаат Алексей Елисеевич айар үлэтигэр ураты миэстэни ылар. Кини үгүс үлэтин манна олорон суруйбута. Онон Хачыкаакка айар дьон дьиэлэрин тутар сөп буолуо этэ, — диэн иһитиннэрдэ Михаил Николаев. Санатан эттэххэ, Алексей Кулаковскай үгүс айымньыларын Хачыкаакка олорон айбыта-туппута. Ол иһигэр «Интеллигенцияҕа суруга» эмиэ манна суруллубута. Ыам ыйын 25 күнүгэр Ил Дархан Айсен Николаев 2023-2027 сыллары Алексей Кулаковскай сылларынан биллэрэрин туһунан ыйаахха илии баттаабыта. Михаил Ефимович бу туһунан этэригэр: — Ил Дархан Айсен Николаев биэс сыл устата Алексей Кулаковскай сылларын ыытарга ыйаах таһаарда. Ити олус хайҕабыллаах. Манна даҕатан, тэрийэр кэмитиэти таһынан уопсастыбаннай кэмитиэттэ тэрийиэххэ диэн этии киллэрэбин. Бу кэмитиэккэ туспа пуонда тэрийиэххэ. Институт уус-уран тылбааһынан күүстэ дьарыктаныахтаах диэн көрөбүн. Нуучча тылыгар эрэ буолбакка атын омук тылларыгар эмиэ. Кини айымньыларын хамаҕатык таһаарыахха. Алексей Елисеевич айымньылара ааҕааччы киэҥ араҥатыгар тарҕаныахтаах, тиийиэхтээх, — диэн бэлиэтээтэ.

Аграфена КУЗЬМИНА