Сунтаар политехническай лиссиэйин VI, VII кылааһын үөрэнээччилэрэ Кыайыы күнүнэн аккырыыкка оҥорон, тыыл бэтэрээннэригэр, сэрии кэмин оҕолоругар, лиссиэй аҕа саастаах учууталларыгар бэлэхтээбиттэр. Оҕолор оҕолуу сырдык тыыннаах, ис хоһоонноох, чаҕылхай аккырыыккалара соһуччу, күндү бэлэх буолан Сунтаар сэлиэнньэтигэр ити курдук, тарҕанна.

Сунтаардааҕы политехническай лиссиэйгэ “Рисуем все” диэн СӨ бастакы Президенэ Михаил Николаев бырайыагынан оҕолор эбии дьарыктаналлар. Ол курдук, VI, VII кылаас үөрэнээччилэрин СӨ үөрэҕириитин туйгуна Галина Егоровна Федотова үөрэтэр. Манна уруһуй куруһуогар, устуудьуйатыгар дьарыктаммат оҕолор хабыллыбыттар. Учууталлара Галина Егоровна этэринэн, иитиллээччилэрэ манна хааччаҕа суох, “көҥүл” тиэмэҕэ уруһуйдууллар.

— Оҕо туох эрэ туһалааҕы оҥоруохтаах, – диир Галина Егоровна. – Ол иһин бу Кыайыы күнүгэр аналлаах бастыҥ уруһуйдары аккырыыкка гынан, аҕа саастаах дьоммутугар утары ууннубут, сорохтор бэйэлэрин чугас аймахтарыгар бэлэх гыннылар. Уруһуйдуур, ойуулуур диэн — тулалыыр эйгэни, аттыгар баары үөрэтии, чинчийии, өйдөөн көрүү.

Галина Егоровна оҕо ис көҥүлүн күөмчүлээбэт, төттөрүтүн, уһугуннарар, сайыннарар, байытар учуутал. Уруһуйдуу олорон, эмискэ, хоһоон гына суруйар, айар оҕолор эмиэ бааллар эбит. Үгүстэрэ араас быыстапкаларга кыттан, ситиһиилэнэллэр. Холобур, Галина Егоровна салайар “Спектр” уруһуй устуудьуйатын иитиллээччилэрин кытта, С.А.Зверев аатынан норуот айымньытын мусуойугар улуустааҕы “Байанай” быыстапкаҕа быйыл сэтинньи ыйга кыттыбыттар. Өссө “Кыһын Саха сириттэн саҕаланар” фестивальга оҕолор айар куонкурустарыгар кыттан, ситиһиилэммиттэр. Дьокуускайга Национальнай бибилэтиэкэҕэ “Спектр” устуудьуйа иитиллээччилэрин кытары үлэлэрэ быыстапкаҕа көрдөрүүгэ турбут.

“В художнике исток творения. В творении исток художника. Нет одного без другого...” диэбитэ ньиэмэс бөлүһүөгэ Мартин Хайдеггер. Лиссиэй үөрэнээччилэрэ тулалыыр дьоннорун салгыы да үөрдэ, олох дьэрэкээн өҥүн наардаан көрө сырыттыннар.

Жанна Леонтьева