Новости библиотеки

Палисфон—дорҕоон кута

Статья о символе международного конкурса "Розовая чайка" - палисфоне. (на якутском языке)

Бэс ыйын 30 күнүгэр Суорун Омоллоон аатынан Опера уонна балет Государственнай тыйаатырыгар «Саһарҕа хоптото» норуоттар икки ардыларынааҕы куонкурус үөрүүүлээхтик аһыллыбыта. Сити күн тыйаатыр  иннигэр «Саһарҕа хоптото» сүрүн бэлиэтэ—палисфон бар дьон көрүүтүгэр турда. Бу күннэргэ итиннэ төрөппүттэрин батыһа сылдьар кырачааннар, эмдэй-сэмдэй оҕолор, оннооҕор улахан дьон дорҕоон кутугар чугаһаан,  истиэххэ кэрэ матыыптары таһааран, дуоһуйдулар.

Россия норуодунай артыыһа, СӨ судаарыстыбаннай сүбэһитэ Андрей Борисов:

– Киэһэ хойукка диэри бу хараабыл курдук инсталляция (тимиртэн дьүһүйүү) тула элбэх киһи тоҕуоруһар. Оннооҕор, муусукаттан, ырыаттан-тойуктан тэйиччи эйгэлээх дьон сөҕө-махтайа, кэрэхсии туралларын көрүөххэ сөп, – диир.

Палисфон—металлофон уонна алтан хобо тыастарын санатар.  Баҕалаахтар сөбүлүүр матыыптарын аа-дьуо тыаһатыахтарын сөп. Биир  бэйэм саха төрүт матыыбын «Көлүкэчээни» оонньуурга үөрэнним. Тимиртэн дьүһүйүү үөһээ өттүгэр хомуос сулус, саһарҕа хоптото киһи болҕомтотун тардаллар. Аттыгар туран хаартыскаҕа түһээччи элбэх.

  

Диана Варламова, Дьокуускай куорат олохтооҕо:

– Бу тимиртэн дьүһүйүүнү көрөн, оонньоон баран, ааһан хаалбыт оҕо  сааспар төннүбүт курдук сананным. Кэнники кэмҥэ дьон духуобунай култуураҕа төннөн эрэр. Опернай, классическай кэнсиэртэргэ эдэр ыччат, аныгы интеллигенция бэрэстэбиитэллэрэ үгүстүк сылдьалларын бэлиэтии, үөрэ көрөбүн. Холобур, «Евгений Онегин» үгүс истээччилээх, көрөөччүлээх ситиһиилээхтик ааспытын өйдүүбүн. Сиэним «Туллукчаан» биэбэйиккэ сылдьар. Арай маннык палисфон биэбэйик тиэргэнигэр турара буоллар, кырачааннарбытыгар төһөлөөх туһалаах буолуо этэй?     

Ааптар кимий?

Бар дьон сэҥээриитин ылбыт үлэ ааптара кимий? Россия дизайнердарын Сойууһун чилиэнэ, П.П.Романов аатынан ойуулуур-дьүһүннүүр училище уус-уран салайааччыта, Орджоникидзе уулуссаҕа турар Ойуунускай мемориальнай пааматынньыгын архитектуратын,  «Сайсары күөлгэ «Азия оҕолоро» оонньуу уотун уматыы» бырайыак  ааптара—Ариан Арианович Ермолаев. Ойуунускайы оҕо эрдэҕиттэн сөбүлээн аахпыт, саха аныгы дьоҕурдаах дизайнердарыттан биирдэстэрэ  Ариан Ермолаев туһунан былырыын сэтинньи 13 күнүгэр «Кэскил» хаһыат суруйбута.  

   

Ариан Арианович бэйэтэ билинэринэн, оҕо эрдэҕиттэн уруһуйдуур. Барыта оҕо саастан ситимнээх буолан, бу эйгэҕэ идэтийбит. «Сайсары күөлгэ ооньуу уотун уматыы» инсталляция эмиэ бэйэтин оҕо сааһын кытары ыга ситимнээх. СӨ бастакы Президенэ М.Е.Николаев көҕүлээбит «Рисует все»  бырайыагын барылын торумнаабыт дьонтон биирдэстэрэ эмиэ кини.

– Палисфону куорат биэбэйиктэрин, оскуолаларын аттыгар аа-дьуо туруоруохха сөп. Кээмэйэ маннааҕар дьоҕус да буолуон сөп. “Северная   механическая компания» тэрилтэ (дир.В.Н.Слепцов, сүрүн инженер Л.В.Мамаев ) түүннэри-күнүстэри оҥордо. Соторутааҕыта бу  тэрилтэ үлэһит дьоно Саха гимназиятыгар Хомуһу оҥорон туруордулар, – диир ааптар.

Жанна Леонтьева.

Ааптар түһэриилэрэ.

Поделиться в соцсетях: