Новости библиотеки

Бастакы президент библиотекатыгар Ийэ тыл кунэ

Олунньу 16 күнүгэр Саха Республикатын Бастакы Президенин Библиотекатыгар Ийэ тыл, суругун-бичигин күнүн бэлиэтиир сэргэх тэрээһин буолана ааста.

Хайа баҕар омук төрөөбүт тылын билэр, таптыыр, сыаналыыр кэнчээри ыччаттаах буоллаҕына, тыыннаах буолар, салгыы сайдар, барҕарар кыахтанар. Тыл – бүтүн норуот национальнай баайа, кэлэр кэскилэ буолар. Ону тэҥҥэ атын омук тылларын баһылаан ураты санаалаах, туспа культуралаах саха норуота үйэлэртэн-үйэҕэ хаалар биир улахан суолталаах олугун түстээн Саха Республикатын Бастакы Президенэ М.Е.Николаев 1996 сыллаахха олунньу 9 кунугэр 1294 нуемэрдээх Ыйаах таьаарар. Бу Ыйаах төрөөбүт тылы сайыннарар, тургутар сыаллаах, сахалартан бастакы лингвист – учуонай, саха алпабыытын төрүттээччи Семен Андреевич Новгородов аатын уйэтитэргэ, кини төрөөбүт күнүн, о.э олунньу 13 күнүн Ийэ тыл, суругун-бичигин күнүнэн биллэриллэр. Онтон ыла үгэс буолан республика үрдүнэн саха сирин олохтоохторугар, үүнэн эрэр көлүөнэҕэ аналлаах түһүлгэлэр, төгүрүк остуоллар, тэрээһиннэр буолаллар.

Быйылгы буолбут СӨ Бастакы Президенин библиотекатын тэрээһинин Өктөм лицейын 4 кылааһын үөрэнээччилэрэ “Мин дойдум” (учууталлара Большакова Галина Дмитриевна) диэн ырыанан саҕалаатылар. Бу күҥҥэ анаан оҥоһуллубут “Ийэ тыл уонна сурук-бичик күнэ” уонна “Бэлэм буолтан” – “Кэскилгэ ” диэн быыстапканы библиотека үлэһиттэрэ билиһиннэрдилэр.

Көрсүһүүгэ сүрүн сыала-соруга буолар: өр сылларга “Бэлэм Буол” - “Кэскил”, “Юность Севера”, “Учуутал аргыьа” уонна “Учительский вестник” хаһыаттарга сүрүн редакторынан иилээн-саҕалаан үлэлээбит, Саха республикатын биллиилээх суруналыыһа, Саха Далбар Хотуна Н.И. Протопопова архыыбыттан Бастакы Президен М.Е. Николаев библиотекатыгар 80 хаартысканы харалга туттарыыта.

Боротокуол быһыытынан архыыбнай хаартыскалары аҕалан туттардылар Васильев Алексей – “Юность Севера” хаһыат кылаабнай редактора, Россия фотохудуоһунньуктарын Сойууһун чилиэнэ, Нина Иннокентьевна сиэнэ уонна Жанна Леонтьева – “Кэскил” хаһыат сурналыыһа, Саха Республикатын бэчээтин туйгуна, Россия суруналыыстарын  чилиэнэ. Историяны кэрэһэлиир хаартыскалары дьон-сэргэ, үүнэр ыччат көрүүтүгэр ууммут сырдык санаалаах дьон бааллара олус кэрэхсиир, үөрдэр.

Хас биирдии хаартыска тус-туспа историялаах, дууһалаах... ол кэмнээҕи түгэни киһи өйүгэр-санаатыгар хатыыр суолталаах буолар. Нина Иннокентьевна архыыбыттан кэлбит хаартыскалар тула дириҥ ис хоһоонноох кэпсэтии буолла. Онно ыҥырыллыбыт ытык ыалдьыттар:   Поисеева Альбина Иннокентьевна, СӨ “Барҕарыы” национальнай фондатын дириэктэрэ, Ил Түмэн үс төгүллээх депутата, РФ уонна Саха республикатын үтүөлээх үлэһитэ, техническай наука кандидата; Божедонова Анастасия Николаевна, CӨ үөрэҕириитин үтүөлээх үлэһитэ, норуот үөрэҕириитин туйгуна, социология билимнэрин кандидата, Томская Клара Николаевна, Чапаевтааҕы ситэтэ суох оскуолатыттан - Өктөм лицейыгар дылы алын кылаастар учууталларынан өр сылларга үлэлээбит, СӨ үөрэҕириитин туйгуна,  кэлэннэр санаа үллэстэн, оҕолорго сүрдээх сэргэх сэһэннээх буоллулар.

Күрсүһүүгэ Өктөм лицейын 4 кылааһын (учууталлара Большакова Галина Дмитриевна), 3а кылааһын (учууталлара Федорова Наталья Петровна), Өктөм орто оскуолатын 7-8 кылааһын (учууталлара Диодорова Елизавета Семеновна), Уулаах-Аан орто оскуолатын 6 кылааһын (Заморщикова Луиза Семеновна- оскуола библиотекаря)  оҕолоро кэлэн утары хоруйдаах, дорҕоонноохтук хоһоон ааҕаннар көхтөөхтүк кыттыыны ыллылар.

Өссө даҕаны маннык тэрээһиннэр үксүү турдуннар, төрөөбүт тылбыт туругурарын туһугар үлэҕэ көхтөөхтүк  кыттыҥ диэн ыҥырабыт.

 

Лена Петрова,

СӨ Бастакы Президенин библиотекатын үлэһитэ

Поделиться в соцсетях: