Үөрэх эйгэтигэр бастыҥ көрдөрүүлээх үөрэнээччилэр, учууталлар Михаил Ефимович Николаев  “Билиигинэн    кыайыаҥ” диэн бириэмийэтин тутар чиэскэ тигистилэр. Бириэмийэни туттарыы сиэрэ-туома СӨ бастакы Президенэ М.Е. Николаев төрөөбүт күнүгэр, сэтинньи 13 күнүгэр, XV төгүл ыытылынна.

Сыралаах үлэни сыаналаан

– Быйыл эмиэ, биир дьиэ кэргэн дьонун курдук, 15-с төгүл манна мустан, билиини, сырдыгы тарҕатааччы учууталлары, Сахабыт  сирин инникитэ буолуохтаах оҕолорбутун чиэстиибит. Хотугу дойду дьоно,  Саха сирин олохтоохторо атыттарга ураты тулуурбутунан,  дьулуурбутунан холобур буола турабыт. Ону биһиги эпоспыт, баай култуурабыт, сиэрбит-майгыбыт туоһулуур. Билии көмөтүнэн биһиги аан дойду, Россия  цивилизациятын өлүүскэтэ буолабыт. Биһиги IT-индустрияны, технопаркалары, өйдөөх экономиканы сайыннарарга дьулуһабыт. Бүгүн манна “Билиигинэн кыайыаҥ” араас сыллардааҕы стипендиаттара кинилэри үөрэппит, билии кыымын сахпыт, күөдьүппүт учууталларыгар махтал сылаас тылларын анаабыттара истэргэ сүрдээх үчүгэй, – диэтэ СӨ бастакы Президенэ, государственнай  сүбэһит Михаил Ефимович Николаев.

Быйылгы стипендиаттар

Милена Ноговицына, Ньидьили оскуолатын ХI кылааһын үөрэнээччитэ  (Кэбээйи), Игорь Сивцев, Өрөспүүбүлүкэтээҕи лиссиэй ХI кылааһын үөрэнээччитэ, Иван Тимофеев, П.П. Романов аатынан художественнай  училище устудьуона, Алексей Викторович Гуденко, физико-математическай наука кандидата (Москва), Зинаида Яковлевна Пермякова, Уус Маайа орто оскуолатын уруһуйга, черчениеҕэ учуутала, Ирина Прокопьевна Петрова, В.П. Ларионов аатынан ФТЛ историяҕа учуутала.

Саҥа үрдэл көҕүлүүр күүс буоллун!

Лауреаттар ааттарыттан харда тылы учуутал И.П. Петрова эттэ:

– Биһиги күндү Президеммит Михаил Ефимович 80, 90, 100 сааһын томточчу туолан көрсөрүгэр баҕарабыт!  Өрөспүүбүлүкэ таһымнаах дебаты Хаҥалас улууһугар ыыта сырыттахпытына, дебат хамсааһынын салайааччылартан бастакынан Михаил Ефимович  өйүүрүн биллэрбитэ. Хайҕал сурук, албан аат диэн муҥутуур өһүө буолбатах. Бу ситиһиибит биһигини саҥа үрдэллэргэ көҕүлээтин, кынаттаатын!

Үөрэх туйгуна, “Билиигинэн кыайыаҥ” 2016 с. лауреата Игорь Сивцев:

– 1990-2000 сылларга Сахабыт сирин олус сайыннарбыт киһи – М.Е. Николаев. Медкиин, Муусука үрдүкү оскуолата – кини туттарбыт туһалаах уораҕайдара. Алын кылааһы Мэҥэ Хаҥаласка, Майаҕа бүтэрбитим. Бэһис кылаастан лиссиэйгэ үөрэнэбин. Быйыл лиссиэйбин бүтэрэбин.  Салгыы Москваҕа ФТИ-гэ туттарсыахпын баҕарабын. Кыттыбыт олимпиадаларбыттан саамай уустуктара – Кореяҕа этэ (2015 с.). Онно  Россияттан алта оҕону талбыттара. Сорудахтара, дьэ, ыарахан этэ. Мин үрүҥ көмүс мэтээли ситиһэн кэлбитим.

Зинаида Яковлевна Пермякова, Уус Маайа оскуолатын учуутала, РСФСР норуотун үөрэҕириитин туйгуна, эмиэ быйылгы лауреат:

– Оскуолаҕа 40 сыл үлэлээтим. “Поиск” диэн научнай-чинчийэр түмсүүнү салайабын. Үөрэнээччилэри кытары Алдан, Юдома, Маайа үрэхтэринэн экспедицияҕа сылдьабын. 12 хайысханан (экология, этнография, топонимика, орнитология, о.д.а.) үөрэнээччилэр чинчийэр үлэлэрин   салайабын.

Милена Ноговицына:

– Аҕам политиканы сэҥээрэр, хаһыаттары ааҕар, тэлэбиисэр сонунун кэтээн көрөр. Кини миэхэ СӨ бастакы Президенэ М.Е.Николаев туһунан үгүстүк кэпсээччи. Бэйэм кини дойдутугар, Өктөмҥө, “Өлүөнэ сирэ” форумҥа дьарыктаммытым. Онно саахымат араас дуоската баарын кэрэхсии көрбүтүм. Ону миэхэ оҕолор: “Ити Николаев бырайыага”, – диэбиттэрэ. Мин оскуолабар 84 оҕо үөрэнэр. Кылааспытыгар ахсыабыт. Быйыл оскуолабын бүтэрэн, геннэй инженер идэтигэр туттарсыам.

Жанна Леонтьева.

Кэскил хаһыат,№ 46, 2016 сэтинньи 15 күнэ